საშარდე გზების ინფექცია – ტიპები და კატეგორიები
რა არის საშარდე გზების ინფექცია? ის წარმოადგენს თირკმელების, შარდის ბუშტის ან შარდსადენი მილის ინფექციურ დაავადებას. დაავადების ყველაზე გავრცელებულ ტიპს წარმოადგენს ინფექციური ცისტიტი, რომელიც გამოწვეულია შარდის ბუშტის ბაქტერიული ინფიცირებით.
პიელონეფრიტი წარმოადგენს თირკმლის ინფექციურ დაავადებას, რომელიც ხშირად აღმავალი ბაქტერიული ინფექციის შედეგადაა განვითარებული, ხოლო ურეთრიტი წარმოადგენს შარდსადენი მილის ინფექციის გავლენით გამოწვეულ ანთებით დაავადებას.
საშარდე გზების ინფექცია კლინიკურად შესაძლებელია შემდეგ კატეგორიებად დაიყოს, როგორც გაურთულებელი/გართულებული, მწვავე, ან რეციდიული. ის ძირითადად გამოწვეულია ბაქტერიით. ბაქტერია შეიძლება მოხვდეს ტრაქტში შარდსადენიდან, ან იშვიათად, სისხლით.
კაცებში საშარდე გზების ინფექციები გაცილებით იშვიათია ვიდრე ქალებში, ამიტომ საჭიროა მიზეზების უფრო დეტალური გამოკვლევა. ამის საფუძველი შეიძლება იყოს შარდსადენის შევიწროვება (სტრიქტურა), შარდის ბუშტის კენჭები ან პროსტატის ჯირკვლის პრობლემები, ამის გასარკვევად აუცილებლად უნდა მიმართოთ უროლოგს.
როგორც წესი, საშარდე გზების ინფექციების დროს პროცესი ლაგდება ჩარევის გარეშე 4-5 დღის შემდეგ. ს.გ.ი-ს გართულებები არ არის ხშირი, მაგრამ შეიძლება იყოს სერიოზული და დამთავრდეს თირკლმის უკმარისობით ან სეფსისით. მსგავსი გართულებები უმეტესად გვხვდება დიაბეტით დაავადებულ ან იმუნოდეფიციტის (სუსტი იმუნური სისტემის) მქონე პაციენტებში.
მამაკაცები, რომლებსაც განმეორებით უვითარდებათ საშარდე ტრაქტის ინფექციები, არიან პროსტატიტის (პროსტატის ანთება) განვითარების რისკის ქვეშ.
საშარდე გზების ინფექციების განვითარებისას გექნებათ შემდეგი შეგრძნებები:
- ტკივილი ან წვის შეგრძნება შარდვის დროს (ექიმები უწოდებენ დიზურიულ მოვლენებს)
- ხშირი შარდვა
- ტკივილი მუცლის ქვედა ნაწილში.
შეიძლება საშარდე ტრაქტის ინფექციამ ჩაიაროს საშუალო სიმძიმის სიმპტომებით და ალაგდეს რამდენიმე დღეში. თუმცა, თუ სიმპტომები ძალზე უსიამოვნოა, ან გრძელდება ხუთ დღეზე მეტი, აუცილებელია მიმართოთ უროლოგს.
